top of page
blog #5: xxxxxxxxxxxxxxxxxxxx
blog #6: xxxxxxxxxxxxxxxxxxxx
AB 4 PA
ceramica y pintura contemporaneo
Samuel Sarmiento
29.5.23
Ceramica den proceso. Cortesia di e artista. ©Samuel Sarmiento
Un fusion di storianan y literatura di Caribe
E region di Caribe ta un mescla di culturanan, idiomanan y tradicionnan cu a influencia diferente formanan di expresion artistico manera ceramica y pintura. E publicacion aki ta enfoca riba e relacion entre ceramica y pintura contemporaneo cu storianan y literatura Caribeño, resaltando e importansha di comunidadnan di pesca na Aruba y e resto di Caribe.
Ceramica y pintura semper tabata conecta cu otro y tur dos ta basa riba e uzo di colo, forma y textura pa comunica sentido y emocionnan. Den ceramica contemporaneo, artistanan a pasa e limitenan di e tecnicanan tradicional pa crea piesanan innovativo y imaginativo cu ta refleha nan experiencianan personal y nan influencianan cultural. Esaki ta particularmente evidente den e trabou di ceramistanan Caribeño cu a haya inspiracion for di nan ambiente y den e historianan cu a wordo pasa di generacion pa generacion.
Ciro Abath, Mi Alma, 1994. Cortesia di e artista ©Ciro Abath
Den e storia cortico "To Build a Fire" di Jack London, e ta conta e storia di un homber cu ta desafia e naturalesa fuerte di Alaska. Temanan manera sobrevivencia, resistencia y e forsa di naturalesa ta conecta cu e profecion di artistanan Caribeño, kendenan a uza ceramica pa representa nan mesun batayanan contra cambio climatico, desaster natural y degradacion ambiental. Por ehempel, e escultor Arubano Ciro Abath ta uza klei y glazuur pa representa e bunitesa delicado di carconan di laman, coral, bushinan di lama di spina largo (nomber cientifico Diadema antillarum) y formanan “geomorfologico” cu ta biba den un habitat den riesgo pa motibo di e aumento di temperatura di laman y contaminacion.
Buki To Build a Fire di Jack London’s
Mi ta pensa cu literatura a influencia ceramica contamporaneo. Escritornan Caribeño manera Derek Walcott y Gabriel García Mariquez ta brinda fuentenan rico di inspiracion pa artistanan. E poema epico di Walcott "Omeros" y e realismo magico di García Márquez a influencia hopi obranan di arte cu ta explora temanan di identidad, memoria y e conexion di tur cos.
Derek Walcott, poeta y dramaturgo di St. Lucia kende su trabou generalmente ta explora temanan di herencia, bida Caribeño y comunidad, den su poema “The Sea Is History” (E laman ta historia), e ta skirbi:
"Unda bo monumentonan ta, bo batayan, martirnan?
Unda boso memoria tribal ta? Señornan,
den e bobeda shinishi ey. E laman. E laman
a sera nan den dje. E laman ta historia."
Video bieu di laman di Aruba.
Banda di literatura y e tradicion di storianan oral, comunidadnan di pesca di Aruba y Caribe a hunga un rol importante den e formacion di e tradicionnan artistico di e region. E comunidadnan aki a inspira artistanan pa crea obranan cu ta rindi un tributo na e generosidad di laman, e persistencia di piscadonan y e relacion cercano entre hende y naturalesa. Por ehempel, 'Oda na e Piscador” ta un iniciativa cu ta refleha e herencia di pesca di e isla y su conexion cu laman.
Finalmente, mi ta considera cu e obra di filosofo Franses Gaston Bachelard tambe a tin un impacto profundo riba ceramica y pintura Caribeño contemporaneo. E ideanan di Bachelard tocante e poder transformador di imaginacion y e importancia di memoria y emocion den creashon artistico a resona den mi obra y esun di otro artistanan Caribeño. E concepto di Bachelard di e “poétique de l'espace” (e poesia di espacio) tambe a influencia e manera con ceramistanan y pintornan ta enfoca e creacion di obhetonan tridimensional, ya cu nan ta busca infunda nan obranan cu un sentido di profundidad, sentido y emocion.
Buki The Poetics of Space di Gaston Bachelard’s
Den conclucion, e ceramica y pintura contemporaneo ta conecta di forma inherente den storianan y literatura Caribeño, conectando comunidadnan di pesca di Aruba y e Caribe cu ideanan filosofico di Bachelard, Walcott y otronan. Cu nan obranan, ceramistanan y pintornan a explora temanan di identidad, memoria, resistencia y e poder transformador di imaginacion, creando un net rico di expresion artistico cu ta refleha e herencia cultural diverso di e region.
AB 3 PA
un imagen ta bal mas cu mil palabra
Samuel Sarmiento
20.2.23
Samuel Sarmiento, Sin titulo, (Paardenbaai), tecnica mixto riba papel, 2023. Imagen cortesia Samuel Sarmiento.
E dicho ‘un imagen ta bal mas cu mil palabra’ por indica cu den un investigacion, recursonan visual por yuda nos compronde e contexto di un luga, brindando detayenan cu un facilidad asombroso.
Ora nos traha un schema cu informacion, of pa ta mas concreto, ora nos clasifica coincidencianan y diferencianan, e acto aki por ilustra e progreso di un fenomeno specifico. Un imagen tin e capacidad di hiba nos den un mundo di un manera cu ta dificil uzando palabra so.
Pa e proyecto Oda na e Piscador, mi a dicidi di traha gruponan di obra uzando diferente medionan artistico expresivo manera pintura, ceramica y dibuho. Den un buskeda inicial, mi a acumula potret cu e intencion di profundisa mi mes den e contexto di e comunidad di Aruba na cuminsamento di e siglo anterior, haciendo un identificacion di areanan, hendenan, obhetonan y custumbernan cu a yuda mi visualisa imagenan unda mi por purba di reconstrui e pasado, y asina por crea representacionan di un ecosistema cu evidentemente a cambia door di e intervencion humano.
Platacion di mata di coco, Daimari, Aruba Coleccion Ing. Casper Vredebregt (1948-2016), Imgane cortesia Biblioteca Nacional Aruba
E rapidez di tempo ta ocasiona dificultad. E cambionan den e paisahe y e cantidad di relatonan incompleto cu a wordo lubida na caminda, y cu por ta no a ricibi suficiente atencion, ta hiba nos den un mundo sin relikia alguno.
Cu mi obranan artistico mi ta purba di recontrui storianan rond di e personahe di e piscador. Mi deseo ta pa crea obhetonan cu tin e capacidad di encera e memoria di Caribe, conservando e personahe di e piscador, un individuo cu tur dia ta traha rondona pa awa buscando un miho futuro, un awa fertil, un awa maternal, un paisahe poroso di awanan cla y scur. E mesun awanan cu Gaston Bachelard ta referi na dje den su buki Waters and Dreams (1942).
Despues di mi bishita na A.N.A (Archivo nacional di Aruba), mi a purba di construi un puzzel fotografico conectando e pesca na Aruba cu e diferente otro gruponan di persona cu ta traha colectivamente pa duna bida na e comunidad (Rancho) y purba soluciona e necesidadnan en comun.
Mi obranan ta describi, pero tambe ta trece preguntanan nobo dilanti. Preguntanan cu ta posiciona e comunidadnan chikito den un panorama unda procesonan cu tin e supuesto intencion di mehora un area (gentrification na Ingles), e desigualdad y e abundancia di practicanan no sostenibel ta visibel constantemente. Con nos por conecta cu pasado? Kico ta pasa si e pasado historico aki no ta contribui na e interesnan cu dominante actualmente? Con nos por reflexiona riba nos presente, comprondiendo cu pasado ta un storia continuo di cosnan nos ta lubida?
Pintura den proceso, Aruba (2023). Imagen cortesia Samuel Sarmiento.
Den e imagen aki nos por wak un pintura den proceso, unda un grupo di piscador ta hala un Taray (un reda di pisca). Ta parce manera e personahenan aki ta drif riba un fondo blanco, pero e intencion ta pa mustranan rondona di e luz fuerte di merdia. E luz di un solo cu bo no por wak den e pintura pero ta haci su mes presente, cu su briyo cubriendo tur e colornan riba e fondo di e pintura. Mi a traha e obra aki cu verf acrilico y di zeta (oil paint). E personahenan ta mustra pensativo, cu algun hasta cu cara di sorpresa door di lo cual ta pasa rond di nan.
Obra den proceso (ceramica), Aruba (2023). Imagen cortesia Samuel Sarmiento.
Mi tambe a cuminsa traha riba ceramica, unda e piscadornan ta keda e figura central. Den e obranan aki mi ta haci referencia na e storianan di e piscadornan di Rancho nos a entrevista, trahando un conexion entre lo cual nos por imagina a sosode y lo cual a sosode di berdad, mustrando escenanan fantastico unda e idea di un recuerdo y di lo cual no tey mas ta bin dilanti di un manera sutil.
Samuel Sarmiento, Sin titulo (E yiunan di Olokun), ceramica, Aruba (2023). Imagen cortesia Samuel Sarmiento.
Mi ta interesa den e sensacionan cu ta haci uzo di tur nos sintinan y cu ta tuma luga ora nos recorda lo cual a pasa door di e wowonan di un mucha. Botonan di vela, diferente bestianan marino, sernan fastastico cu ta habita laman, hendenan cu ta bin y ta bay, ta algun di e figuranan cu lo biba den mi obranan di ceramica.
Samuel Sarmiento, Awanan cla, awanan dushi, awanan salo, tecnica mixto riba papel, 2023. Imagen cortesia Samuel Sarmiento.
Pa finalisa mi kier mustra algun di mi dibuhonan den proceso. Den e dibuhonan aki mi ta haci uzo di e acto di ripiticion manera metodo di investigacion, haciendo un reflexion riba e paisahenan natural homogeneo unda e relacion entre tera y laman ta bin dilanti, hungando asina cu e idea di e ‘limite’ di un area y fronteranan geografico.
Samuel Sarmiento, Taray (reda di pisca), tecnica mixto riba papel, 2023. Imagen cortesia Samuel Sarmiento.
Cu e imagennan aki mi por fantasea cu e piscadornan di Aruba ta bay den un mundo di gran profundidad, nabegando rumbo Punto Fijo, La Guajira of hasta Curaçao. Nan ta wak di leu pidanan di tera, cu naturaleza virgen, como tambe awanan cla, dushi, salo, trahando liñanan imaginario riba awa, marcando nan ruta di biahe guia door di streanan, solo y luna, scapando awacero y tormenta, den imagennan cu ta bal mas cu mil palabra.
AB 2 PA
trahando un mito di e pasado
Samuel Sarmiento
15.12.22
Tabata tin señal den e aire
Tabata tin anuncio den e shelo
Vicente Huidobro, escritor Chileno.
Bista aereo di sneeuw den shelo (cartografia di America), medio mixto riba papel, Aruba, 2010.
Pa e proyecto Oda na e Piscador, mi ta skirbi mi publicacionnan cu un enfoke descriptivo. Kinan mi ta comparti parti di mi proceso, como tambe algun pregunta y pensamento conecta na e desaroyo di e investigacion. Recientemente mi a duna un lectura na Fundacion Rancho, hunto cu Ana Maria Hernandez y Clifford Rosa unda mi a comparti mi enfoke pa e proyecto, creando diferente conexion na nivel teoretico y artistico entre e piscador manera simbolo di herencia y identidad, y e comunidad di Rancho - un comunidad di piscador.
Mi lo comparti brevemente algun di e ideanan mi a presenta durante e lectura aki y e discusion informal cu e comunidad y otro artistanan.
During my talk at Rancho Foundation entitled 'The mythification of the past' , Aruba, 2022.
Na e cuminsamento di e lectura aki, yama Trahando un mito di e pasado, mi a hay’e importante pa aclara cu e material mi lo presenta ta opinionnan personal y no berdadnan absoluto. Mi ta kere cu ta importante pa habri e bentana pa debate y dialogo.
Mi a cuminsa presentando e antecedentenan teoretico y puntonan di interes den mi creacion artistico. Entre 2009 y 2012 mi a sinti un interes especial pa e temanan relaciona cu lo cual nos ta considera rural y su conexion cu lo cual nos por yama actividadnan di sobrevivencia basico, manera jaagmento, cria y colectamento. Den e tempo ey, mi a traha algun dibuho di piscadornan, tempo mi tabata bishita Aruba pero mi tabata biba na Spaña. Trabou diario, referencianan historico y folklorico, actividadnan cu proposito di comunidad y un necesidad di anhela e pasado, tabata temanan y recurso mi a ripiti cu gusto den mi obranan.
E temanan aki, cu tin un aparente relacion cu otro, por haci uzo di tradicionnan oral y influencianan literario no homogeneo como un ‘backdrop’ of hasta como un prologo pa e storianan visual di mi creacion.
Durante e lectura mi a presenta algun nucleo di investigacion (historia, pasado, e creencia den un salbado, progreso) y mi a pensa e lo ta bon pa establece un analogia conecta na Aruba (of cualkier isla den Caribe) cu e personahe di e Turco Mecanico di Wolfang Von Kempelen, crea na 1770.
E artefacto aki tabata un figura cu por a hunga ajedrez contra cualkier persona, y niun hende por a compronde con un popchi por a move su so y gana wega. Hopi aña despues nan a bin descubri cu un homber bou di e artefacto tabata controla e famoso Turco Mecanico. E ser automatico aki a resulta di ta falso.
E Turco Mecanico di Wolfang Von Kempelen.
Den un geografia di islanan feliz y di sonrisa eterno y amistoso, Aruba lo por resalta como un paraiso cu un oferta cultural fuerte. Pero en realidad hopi artista y gestor cultural local ta traha for di un punto di inestabilidad, similar na e piscadornan, cunukeronan y comerciante chikito local, actuando lihe pasobra awe nos por traha pero mañan nos no sa…
Den e lectura, y sin miedo di establece e lugar, mi a menciona cu e isla no ta sostenibel riba diferente area, pero toch ta ofrece un imagen festivo, tin biaha un tiki muhco colorido, creando e impresion cu nos ta un oasis of un ilusion optico similar na esun di e Turco Mecanico. Den e performance di isla-paraiso aki, hopi di lo cual ta parce un sociedad cu ta funciona y ta autosuficiente, no ta nada mas cu un ehercicio di marketing turistico. Esaki ta mustra inconsistencia y ta laga hopi biaha e necesidadnan di e comunidad sin wordo scucha, creando un desconexion entre e construccion di un ideal di progreso y e circunstancianan cu di berdad ta afecta e comunidad.
Na final di e charla, y cu un tono mas optimista, mi a pidi pa nos ta mas solidario cu e pasado y pa nos relacionan nos mes cu ne uzando empatia, comprondiendo cu e Caribe ta un escenario pa un expropiacion continuo, unda e excuus di progreso y e apariencia di ta un destino amistoso pa e bishitante, sempre ta stroba e caminda pa cambionan structural necesario pa e beneficio di e comunidad. E lectura a caba sin contratiempo y cu entusiasmo entre esnan cu tabata presente.
Entrevista di Ana Maria Hernandez y Carlito Quandt, medio mixto riba papel, Aruba, 2022
Un siman despues, mi tabata tin e oportunidad di ta presente durante un entrevista cu un piscador local (Carlito) y un biologo marino (Byron).
Tur dos combersacion a bay di general pa particular, cu un enfasis riba e aspecto tecnico di piscamento y e studio di e bida marino, como tambe un intercambio di anecdota y experiencia di con bida tabata na Rancho un tempo pasa.
Nan a papia di e rol di e piscador como un proveedor, como tambe e peligernan riba laman, e economia colectivo, y bista pa futuro.
Den un proximo publicacion mi lo papia mas di e entrevistanan aki, pero awo caba mi por comparti cu mi ta haya importante pa haci visibel e necesidadnan di e comunidad di Rancho, pa por genera sistemanan cu ta duna paso na un comunidad horizontal cu ta tene en cuenta e diferente grupo di persona cu ta haci nan bida na Rancho.
E horizonte fugitivo, medio mixto riba papel Kassel, Alemania, 2022.
AB 1 PA
liña imaginario riba lama
Samuel Sarmiento
18.11.22
Si bo kier Traha un boto, no yama tur hende pa busca e palo, dividi e trabao, y duna ordo. Miho, siñanan con pa desea e inmensidad di lama.
Antoine de Saint-Exupéry, Citadelle , 1944.
Na 2013 mi a dicidi di bin biba na Aruba. Un aña prome, casi manera un presentimento pa mi prepara mi mes, mi a lesa un y otro biaha e historianan den 'Tales from the South Seas' skirbi door di Jack London y 'The Invention of Morel' skirbi door di Adolfo Bioy Casares.
E lectura aki a yudami desaroya dos liña di pensamento. Lesando Jack London, mi a logra di wak e relacion entre ser humano y e lama, y con e inmensidad di e awa por influencia nos manera di biba. Door di biaha, pisca, comercio y hasta contrabando y pirateria, ta transitonan simpel door di un ecosistema poroso na unda awa semper ta testigo y nunca ausente.
South Sea Tales (1911) di Jack London.
La invención de Morel (1940) di Adolfo Bioy Casares.
Alabes, e storianan di Bioy Casares ta trata temanan como inmoralidad, e paso di tempo y e regreso eterno, riba un isla chikito yen di circunstancianan misterioso. Esakinan ta construccionan di relato cu te dia di awe, mi ta relaciona cu Aruba, manera un reflejo accidental.
Dies aña pasa, m’a cuminsa cu dibuho y pinturanan inspira pa e actividadnan relaciona cu sobrevivencia humano manera jaag, criamento di bestia, y recoleccion. Pesca y e personahe di e piscador a hala mi atencion, debido na con e accion di piscamento por wordo mira como un mescla entre jaag y recoleccion, una suerte semper ta presente, pero ta rekeri di conocemento y experticio como tambe un proceso di preparacion na cuminsamento di cada dia, cu hopi biaha ta casi un ritual.
E piscador y su amigonan, verf acrilico y potlood riba papel, Aruba, 2009.
Den mi buskeda pa e personahe di e piscador y di otro ofishi cu ta rekeri estructuranan di colaboracion pa haci transferencia di informacion entre generacionnan, m’a descubri simbolonan, storianan, canticanan y un variedad di obhetonan cu ta enrikece e bida di e ser humano su labor diario cu color, zonido y significa. Nan ta adorna e bida cotidiano cu folklore y representacionnan.
Piscadornan ta trek reda, acuarela y inkt di China riba papel traha na man, 2012.
Tin biaha mi ta wak e historia di humanidad, den e caso aki e historia di e piscador, como un fluho di elementonan cu ta wordo influencia pa e necesidadnan tanto invididual como conhunto. For di esaki ta nace e interaccionnan y experiencianan social, cu hopi biaha ta bira un codigo di conducta of tin biaha hasta un modelo di identidad y cu ta e resultado di structuranan social of e limitacion geografico. Den algun ocasion, e contactonan, aki cu e lama como escenario, ta duna bida na e storianan y leyenda cu ta capaz di duna forma na e herencia intangible. Leu a leu, nos tin e suerte di por presencia esaki den storianan manera Shiosai (e rumor di e olanan) skirbi door di Yukio Mishima.
E yiu muhe di e piscador, verf acrilico y potlood riba papel, Aruba, 2009.
Awe mi ta forma parti di Oda Na e Piscador, un proyecto di colaboracion den arte y comunidad unda mi ta traha cu Fundacion Rancho, Plataforma Aruba y cu e investigacion di Ana Maria Hernandez, purbando di trek liña imaginario, conectando relato, persona, luga, coordenacion, fauna maritimo, tradicionnan oral, strea y planeta, manera un hende cu ta trahando un universo, pero tumando na cuenta un pasado cu ta bibo y cu semper ta pidi nos pa cuestiona nos mes. E texto cortico aki ta forma parti di un grupo di idea cu mi lo sigui comparti durante e proyecto. Te un otro biaha…
Oda na e piscador #1, ceramica, Aruba, 2022.
bottom of page