art's education hub
Samuel Sarmiento, Pactos pampianos, 2019, tecnica mixto riba papel, 36x26cm
Pactos pampianos of Pacto den La Pampa ta un obra cu Sarmiento a traha durante un residencia artistico na Buenos Aires, Argentina. Den e temporada aki, e a cuminsa investiga mas tocante e santonan y leyendanan local, especialmente e simbolo cultural di e Gaucho (un ruiter talentoso y simbolo nacional di forsa, balentia y e campo).
Den su obra, Sarmiento ta mescla e folklore Argentino cu otro figuranan cultural y religioso relaciona cu e campo y areanan rural manera La Pampa of e llano Venezolano. Figuranan cu tey pa yuda nan siguidornan den momentonan dificil, di preocupacion of desesperacion.
E obra tambe ta explora e banda mas humano di e icono di e Gaucho. Un homber cu tambe ta sinti y ta sensible mientras e ta capaz di enfrenta e naturalesa y circunstancianan fuerte.
E punto visual central di e obra aki ta un grupo di individuo para y sinta rond di un candela blauw. Un di e personahenan aki ta sinta, y aunke no por mira mucho detaye den su cara, bo por sinti su preocupacion y consternacion.
E sintimento di angustia ta wordo reenforsa door di e naturalesa cu ta rond di nan. Aunke e colornan ta cla y e formanan no ta menasante, tin hopi movecion cu ta indica cu e tempo (clima) no ta nada faborable pa e grupo aki.
E tres figuranan para patras ta contradeci e angustia di e homber sinta, cu un aspecto mas trankilo y calma. Sarmiento ta haci referencia na e santonan y icononan cu ta duna nan siguidornan speransa y paz.
E figuranan aki ta representacionnan di e Gauchito Gil, un version di un virgen indigena (bisti cu paña di campo), y e idea di un 'homber di campo'.
Den e skina, abou, Sarmiento ta introduci un forma cu ta dificil di identifica. Cu su colornan fuerte y cla y e movecion di e cuashi, e ta duna e composicion un aire optimista. Kico e ta, ta keda na cada ken.
Texto Educativo y Diseño: Ana Maria Hernandez
© 2020 Plataforma Aruba - Rights Reserved