art's education hub
Samuel Sarmiento, La gran cisma, 2020, tecnica mixto riba tela (lienso), 495x210cm.
La gran cisma of E gran division ta un obra cu ta papia di e proceso di separacion cu ta acompaña eventonan grandi den e historia di nos humanidad. Cada avance grandi ta wordo acompaña pa e destruccion of ruptura di algo otro. Un sorto di sacrificio.
La gran cisma ta un evento den e historia religioso cu a tuma luga na 1054, ora cu e iglesia catolico y e iglesia ortodox a kibra nan laso door di diferencianan theologico y politico. E evento aki a trece cu ne cambionan importante cu a marca e desaroyo di e creencianan religioso. Sarmiento ta tuma e simbologia di e evento aki y ta wak e den tur e sucesonan importante den historia. Bo por wak e por ehempel den e 'descubrimento' di America door di Europa unda divisionan entre America-Europa a wordo crea y e ideologia di rasa a wordo implementa dividiendo humanidad den sub-clasenan. Tambe por pensa riba e proceso molecular cu ta haci cu un celula ta reproduci y genera of regenera tehido. Of den un contexto mas actual, con e pandemia di COVID-19 a causa un desconexion entre paisnan y hende.
Aunke e obra ta mustra na prome instancia desordena, e tin un composicion basta precies. Por diferencia tres area den lienso: links, recht y central.
Den e area central por ripara un grupo di figuranan femenino, masculino, humano y animal para den un kring. Tur e figuranan 'humano' ta mustra manera nan ta interactua cu un otro, un contrapartido. Tur excepto e figura na oranjo sinta su so.
Por ripara e combinacion di movecion los di e cuashi y gestonan mas preciso.
E area rechts di e pintura ta druk, yen di forma y colornan fuerte y inespera. Un detaye interesante ta e cabes di e tiger cu un presencia imponente. E ta parce un solo cu ta anuncia su mes cu un grito duro, insinua door di e gestonan di su cara y e capa diki di pintura geel.
E area links tin menos contraste di color y elementonan. Un forma interesante ta e 'mancha' scur y abstracto ariba. E ta parce e marca di un cuashi laga atras casi accidentalmente, pero ora bo wak mas cerca por reconoce un intencion. Cu marcanan cu ta parce mannan na laira, e figura por ta un spirito menasante, flotando den direccion di e grupo central.
Cu su uso di colornan fuerte cu ta interumpi e calma di e colornan pastel y e figuranan organico cu ta contrasta e figuranan mas abstract, Sarmiento a crea un composicion dinamico. E a crea entropia (caos) riba e lienso.
Texto Educativo y Diseño: Ana Maria Hernandez
© 2020 Plataforma Aruba - Rights Reserved